Ein vinsælasta uppskriftin mín er Kría - sjalið sem kom út í fyrstu bókinni minni, Þóru heklbók. Það var mín allra fyrsta uppskrift og gleðin því mikil yfir því hvað henni var vel tekið. Konur hafa heklað Kríuna í hundraðavís og að endingu stökkbreyttist sjalið svo í þennan flotta Kríusmekk í höndum handóðra heklara. Uppskriftin er í grunninn sú sama og að sjalinu, en það hafa svo margir spurt mig hvernig þetta sé útfært að ég hef ákveðið að skella Kríuunganum með hér. Þetta er ótrúlega fljótlegt og skemmtilegt verkefni og útkoman er þessi flotti smekkur sem líkist helst töffaralegum tóbaksklút.